ZPM in an candidate an zuar tha duh lo- Lalruatkima

by News Editor

Tualchhung News

ZORAM TODAY| 5th November, 2025: Vawiin khan Dampa bial Bye-Election campaign chhunzawmin MNF Treasurer Lalruatkima chuan khaw hrang hrang a fang leh a, thu sawiin, "ZPM Candidate hi a bo nge, an thukru zawk tih pawh hriat harsa khawpin ZPM hian an zuar ṭha duh miah lova, a interview te thlengin an khapsak tih thawm thlengin a ri bawk a, Dampa bial tana hmalak a tumna thu hmuh tur a awm loh laiin ZPM minister te news leh thuchhuah hlir hmuh tur a awm thung a, an candidate an tikhawngaihthlak hle a ni," a ti.

"Ṭha bik, thiam bik tura an inzawrh tlat avanga enchhintu kan ṭhalaite hian an Vote kha lak let leh theih se chuan an la let leh duh ngeiin ka ring a ni. Bye-election lo awm turah pawh an workers te an ngui tlat a, ZPM Headquarters-in thuchhuah hranpa meuh siama 'lungsi taka kan ruat' tih a lo ngai ta hian an Candidate laka an lungsik lohzia a tilang bawk a ni," MNF Treasurer chuan a ti a.

"Hmasawnna hna thawhna tur SASCI work Vbc 328 lo chhuakah hian Mamit District (Dampa bial) a tel ve lo va. Hei hian ZPM Sorkarin Dampa bial leh Mamit District an ngaihsak lohzia a tilang chiang em em a ni," MNF Treasurer Lalruatkima chuan a ti bawk.

Lalruatkima chuan Dampa bial mipuite hnenah ngenna siam nawn lehin, "MNF Candidate Dr. R Lalthangliana hi Dampa bial mipuite'n kan thlan tlin chuan Dampa bial hmasawnna kan vote chhuak dawn tihna a ni a. MLA Inthlan lo awm leh turah Pathian leh mipuite zarah MNF in Sorkarna kan chang leh ngei ang a, Dampa bialin Dr. Thangtea in thlan tlin chuan in inchhir hauh lo vang tih a chiang a ni," a ti.